ياللي مشفتش قرب شوف

تاريخ التسجيل : 01/01/1970

ياللى ماشفتش , قرّب شوف
شعب يناير بطّل خوف
كلمة حق ف وش النار
عمر الحق ما كان يوم عار
قالوا كتير عننا مجانين
علشان نحلم بالتغيير
وآدى الحلم , وآدى الأزمة
وآدى نظام مضروب بالجزمة
حلمنا واقع كلّه يشوفه
خرّج كل جبان من خوفه
كل شهيد شلناه ف ضميرنا
و أي سكوت بإديه تأخيرنا
تلاتين عام من ظلم مبارك
امسح وشك , واغسل عارك
كلنا عايشين ف التحرير
كل ما نهتف. يصحى ضمير
مصر اليوم أرض الأحرار
إيدى ف إيدك نبنى نهار
خليك واحد م الثوّار
و اوعى ف يوم تحتاج للخوف
ياللى ماشفتش , قرب شوف

بقلم محمد محمود أبو قاسم